بحبك يا مصر وبعشق ترابك
والف الميادين وارجع لبابك
واحس بكياني وكرامتي في رحابك
يقولوا فقيره يقولوا اسيره بشوفك اميرة
واحبك يا مصر بحبك
مقالب من اختي وغتاته من اخويا
ودعوه من امي تنسيني همي
وحكمة ابويا
واحبك صبيه علي البحر جيه
تبين جمالها وترجع تداري
واحبك مراكب تعدي الي راكب لبر الامان
يدوب جوه نيلك ويعطش يجيلك
يقولك كمان
واقبلك ببوسه في زفة عروسة
ولمة في بيتنا مع اولاد حارتنا
تدق المزاهر ترد المزامر
تزغرد جارتنا نهلل نغني
وحلم التمني ينور ليلتنا
واحبك زياره لبيت عم سيد
ده اصله فقير مش هيقدر يعيد
نعيد عليه نفرح عنيه
ويدعلنا دعوه بمليون جنيه
في ارضك يحس الغريب انه مصري
واحنا الاجانب
ويلقي الرعاية ويلقي الحماية
علي كل جانب
ويمشي في ربوعك ويشبع بجوعك
ويعمل مصايب ويرجع يعايب
وترجعي تسامحي يا ساكنة في ملامحي
يا ست الحبايب
ولادك بنوكي بروحهم فدوكي
ويشهد عليهم ترابك في سينا
ولاد الذين لو جار زمانهم يعودوا لمكانهم
يلاقوا السكينة وتنسي جحودهم
وتبكي عليهم عنيكي الحزينه
في ارضك سرحت فشلت ونجحت
صاحبت الحمام ونمت في سلام
ولو علي البلاطه تغير في شكلي همومي ومشاكلي
لكن روحي لا
اعبر بغنوه واقول نكته حلوه
وقلبي المسالم ما يعرفش الشماته
واقول بالتلاته
بحبك بحبك بحبك يامصر